網購食品無王管 不補漏洞必成災
病從口入，禍從口出，真係一啲都冇講錯o架。好似台灣爆發三文治食物中毒事件咁吖，香港亦受到牽連，多達八十幾人中招，都咪話唔得人驚。尤其係家陣網購食品無王管，當局再唔盡快堵塞漏洞，隨時爆大鑊都似。
衞生防護中心係咁講嘅，化驗後證實三文治受沙門氏菌污染，而且屬同一基因，應該係入口前已經受到污染，加上儲存不當，加速細菌孳生。最棘手係消費者購入三文治嘅渠道多樣，除咗百貨公司及商場攤位，仲有網站購物，極可能事先冇向食環署登記。食衞局官僚話喎，所有食品無論經任何平台入口及分銷，均須向食環署登記，否則即屬違法，局方會密切跟進情況，必要時會執法。
即係咁，網上購物方便快捷，愈來愈普遍，尤其係網購食品，更加係蔚然成風。淨係社交網站咋，專門售賣台日韓等地美食嘅團購專頁多如雨後春筍，就知有幾受歡迎喇。之不過咁，有利就有弊，網購食品係就係方便，可惜絕大部分都係水貨，並非從正式渠道入口，冇監冇管之下，品質、衞生、運輸及儲存都欠缺保證，隨時出事嘅咋。
其實，莫講話網購海外食品無王管吖，當局對網購本地食品一樣係隻眼開隻眼閉。現行法例下，凡未領有食物製造廠牌照以及預先包裝嘅食物，必須列明名稱、配料、保質期等資料，但實際上好多本地網購食品，包裝盒上並無成分標籤，而且大部分係無牌工場製造，擺明係監管甩漏喇。
當局長期對網購食品不監不管，法例又追唔上形勢，消費者健康完全冇保障，想唔出事都幾難。正所謂，預防勝於治療，網購係大勢所趨，港府好應該與時並進，特別係食得落肚嘅食品，規管更要嚴之又嚴。好似德國咁吖，早已成立機構專責抽驗網上食品；又好似內地吖，正修例規定經營者必須取得食品生產經營許可。反觀香港對網購嘅監管連內地都不如，食環署一年嘅檢控數字，十隻手指數得晒，究竟有幾兒戲，大家心照喇。
講番轉頭，市民自己亦要衡量風險，好似三文治呢類有醬汁嘅高風險食物，更加要打醒十二分精神，千祈唔好亂食吖。吃一塹，長一智，經過今次三文治中毒嘅教訓，港產官僚話會研究規管網購食品嘅條例喎。嗱，遲到好過冇到，講多無謂，行動最實際吖，叮！
