城中鏡：仁濟搵水源
經濟市道淡靜，慈善團體都要絞盡腦汁搵新「水源」。仁濟醫院海外學生會及董事局早前攜手舉行「海外學生仁濟夜」慈善餐舞會。作風低調嘅香港海南社團總會常務副會長王祿興同太太王符文靜都有到場，力撐做今屆海外學生會主席嘅愛女Joy王嗣鴻。仁濟副主席Macy黃美斯笑稱，係身兼海南社團總會署理會長嘅百仁基金主席李文俊居中牽線，佢見王祿興咁有「實力」，Joy又咁有愛心，梗要搵佢哋幫手籌款啦！
林煒珊（左起）、黃美斯同王嗣鴻為仁濟籌款不遺餘力。
王祿興（左）與太太王符文靜現身撐囡囡。
鮑誠業（右）同方志基將帶學生到蘇格蘭交流。
講到籌款難，仁濟主席林煒珊好大感觸。佢話為咗游說城中知名家族慈善基金捐助仁濟，可謂絞盡腦汁，現時佢哋正努力諗新穎、具吸引力嘅籌款項目，冀可成功搵到大水喉。
方志基助中學生遊學
仁濟總理Sammy鮑誠業同慈善機構「香港蘇格蘭教育聯盟」創辦人Nigel方志基都喺度。Nigel五年前開始捐助蘇格蘭同香港兩地中學生嘅交流，近兩年就被Sammy成功游說搵仁濟旗下中學生去交流，今年十一月佢哋就會帶仁濟旗下三間中學約三十名學生到蘇格蘭交流十二日。
Nigel話咪睇小短短十二日，結果可能改變一生。Nigel話對一個案例印象深刻，話說有個三百磅嘅肥仔遊學後體驗到健康嘅重要性，於是的起心肝喺一年內減至一百四十磅。故事咁勵志，難怪佢樂此不疲分享啦！
