仲記得中大醫學院院長陳家亮喺今年文憑試放榜前夕，宣布推出新招「跳級制」吸納「尖中尖」學生，容許成績達標的考生直升二年級，但卻遇上港大攔路虎。港大醫學院院長梁卓偉連環反駁，多番強調教育無捷徑，令醫委會介入決定重新審視課程，中大焗住暫緩執行「跳級制」，最終港大盡攬七名應屆狀元入讀醫學院課程，先勝一仗。

設計圖片及對白

喺冇跳級嘅情況下，中大醫學院自然吸引力大減。一如所料，喺最新嘅大學聯招放榜中，十一名應屆狀元全被港大吸納，有七人選擇入讀港大醫學院，搶盡風頭，而中大醫學院當然係拍晒烏蠅啦，至於收生成績最高依然係環球醫學領袖培訓專修課程。

中大醫學院吸納尖子計劃失敗，嚟緊又要面臨醫委會調查，「跳級制」係咪可重推，將取決於醫委會轄下教育及評審委員會嘅調查結果。據了解，委員會將審核中大醫學院提交嘅文件，查明去年課程審核有否提及「跳級制」，並與校長、院長等管理層會面，了解「跳級制」實際運作。

有中大人士分析，即使今次通過醫委會嘅審核，但因為中大醫學院早前推出「跳級制」時，備受社會各界爭議，負面聲音唔少，已令校譽受損，故憂慮重推計劃亦會再受非議，認為院長要三思而後行，「唔搞好過」喎。不過，做醫生係經過考核先可以掛牌，係咪跳一年班就影響到學生將來考取專業資格呢？究竟有關方面對自己嘅考核制度冇信心吖？抑或驚被人搶晒啲尖子學生呢？

第一手消息請下載on.cc東網iPhone/iPad/Android/Windows Phone Apps