沈振盈話自己預測個市由年初到依家都有九成準。（資料圖片）
訊匯證券行政總裁「沈大師」沈振盈，多得討論區巴打絲打「畀面」封咗佢做「燈神」，佢今次要大平反，話自己預測個市由年初到依家都有九成準咁話。佢尋日仲預言，個市去到九月、十月會再冧過。
沈大師本身識玄學術數，年初仲由玄學角度預測過全年個市，話今年四月五日至五月五日屬「庚辰月」，天干屬金，庚金乃強金，助升市，不妨進取啲入貨。睇番四月八日復活節假之後，港股又真係跟A股爆升！
大師講過六月六日至七月六日屬「壬午月」，天干屬水，但地屬火，呈水火交戰局，話股市易招損失。結果？咪中港齊齊股災，阿爺全方位托市，大媽們對住股價牌齊唱「起來，不願做奴隸的人們」，咁仲唔係「水火交戰」局？
七月七日至八月七日屬「癸未月」，大師話天干屬水，加埋夏天就快完，火嘅旺氣漸退，個市或會急跌。又確實，七月八日港股急插超過一千四百點，跌穿二萬四千點，雖則之後幾日反覆上番二萬五千點樓上，但近日又跌番落嚟「冇翻身」。
之前嗰啲又幾準，咁之後又點？佢話上星期六「立秋」入「甲申月」，屬金剋木之局，市會逐步回升，又話本月財星到，叫吸納吓屬金嘅股份，即係內銀內險類喎。沈大師又話九至十月恒指有機會見頂，仲話十月可能係最後一擊，保住老本過寒冬咁話。風水術數嘅嘢，真係信不信由你嘞！
第一手消息請下載on.cc東網
