李家祥（右）對太空科技發展抱有期望。左為立法會工程界前議員何鍾泰。
由於高新科技發展飛快，以往有啲看似遙不可及嘅事物，今日已經尋常不過。馬會大董李家祥日前出席一個小太空人凱旋歸來嘅慶功宴，席間講到十幾年前同太空有關嘅尖端科技，好多都應用於現代人嘅生活，若果按呢種趨勢發展落去，人類將來上太空旅遊都可能係一件平常事。
李家祥話早前去美國自駕遊，喺衞星定位儀嘅導航之下穿越山林小徑，暢遊紅杉樹國家公園，又往國王峽谷尋幽探秘，玩得相當盡興。肩負起「盲公竹」任務嘅衞星定位儀，都只係百多美元，回想起十七年前佢首次擔任小太空人計劃嘅評判，當時自駕遊只能夠靠睇地圖搵路。
李家祥寄望將來嘅科技發展，可以將載人上太空嘅成本大幅降低至大家都可以負擔嘅水平，等佢都能夠一嘗太空旅遊嘅滋味。
第一手消息請下載on.cc東網
