設計圖片及對白
喺上月底召開嘅立法會房屋事務委員會會議上，有議員提出引用《立法會（權力及特權）條例》（特權法）調查多個屋邨嘅食水被驗出含鉛量超標一事，但喺建制派護航下遭否決。事隔唔夠一個月，當日有份否決引用特權法嘅建仔忽然轉口風，話如果政府八月前唔公布獨立調查委員會嘅名單，就唔排除支持引用特權法調查鉛水事件。不過，有傳政府最快會喺今個星期內公布委員會任命，建仔呢個舉動隨即惹來同政府夾埋做戲嘅猜測。
製造「成功爭取」假像
建仔日前要求政府委任法官作為獨立調查委員會主席調查鉛水事件，佢哋嘅議員阿Ben陳恒鑌亦講過，如果政府八月前唔公布委員會名單，佢哋唔排除支持引用特權法調查鉛水事件。事有湊巧，最近有消息話政府最快會喺今個星期內公布委員會任命，阿Ben尋日接受電台訪問時，被問到佢同建仔係咪一早收到風，知道政府就快公布名單，於是夾埋做呢場大龍鳳，從而製造出「建仔成功爭取」。
阿Ben喺訪問中否認做戲，強調無收到任何消息，又話如果政府短期內能夠成立調查委員會，立會就未必需要調查。至於幾時先引用特權法，佢認為如果政府跟進未到位，立會先引用相關權力，以免調查「架床疊屋」喎。
其實建仔又好難怪被人質疑佢哋同政府夾埋做戲嘅，事關佢哋已有前科，好似上月舉行嘅特首答問大會，佢哋嘅主席李慧琼提問時指出，收到大量市民同區議員投訴，過去一段長時間街道清潔做得唔好，當局會唔會推動全港性清潔運動。佢呢頭講完，特首就宣布會推出全城清潔運動。唔單止咁，早前阿Ben同另一名建仔議員何俊賢大搞衞生黑點，月初又牽頭搞地區清潔宣傳活動，咁多事件加埋一齊，係咁啱定夾埋真係得佢哋先知喇！
第一手消息請下載on.cc東網
