食水危機無了期 鉛禍皆因官禍起

唔係嚇你，房屋署證實，部分仍施工中嘅公屋地盤發現水管焊接料含鉛，需要將已安裝嘅水喉全部拆除重鋪，受影響嘅包括觀塘安達臣道公屋地盤第一至五座等。古人話，一節見則百節知。小小一節含鉛水管，反映監管公屋水務工程漏洞多多，連興建中嘅公屋都無法幸免，證明鉛水問題唔係個別事件，已經曝光嘅個案可能只係冰山一角咋。

公屋未落成先中毒，無疑令人震驚，其實諗深一層，一啲都唔出奇。係人都知，港府話就話對公屋有監管及驗收制度，但一向求求其其，既唔檢查水管焊接位，又無化驗水質，把關粗疏，唔出事至奇喇。可以大膽講句，當局再唔撥亂反正，堵塞漏洞，食水安全危機肯定「鉛鉛不絕」，到時咯喎，換水喉隨時仲頻繁過換局長吖，叮！

所以話，港府聲稱香港係食水最安全地區之一，大家聽吓好嘞，千祈咪當真。喺其他先進地區，食水含鉛超標可以講係匪夷所思，點知喺香港已經成為家常便飯，居民連飲啖乾淨食水都幾乎成為奢望，唔止係港人嘅不幸，更加係港府嘅恥辱。話時話，鉛禍唔止令公屋居民提心吊膽，私樓居民一樣人心惶惶，當局喺加強公屋驗水嘅同時，係咪亦應該諗吓點樣解決私樓水質問題？

即係咁，興建中嘅公屋暗藏鉛禍，問題相對容易處理，換晒水喉就一了百了，最棘手係已經入伙嘅公屋如何善後呢？嗱，日前又多一個屋邨驗出食水含鉛量超標，馬鞍山欣安邨成為第八個中招者。而驗出血鉛超標嘅居民又增加十二人，全部係兒童、孕婦同哺乳婦女，其中一名一歲兒童超標一倍。官僚唔能夠為市民排憂解困，反而一味縮骨卸膊，唔怪得居民怨聲載道喇。都係立法會議員講得啱，風波爆發咁耐，港府部門一直互相卸責，互相扯皮，至今連問題究竟出喺邊度都唔知，靠佢哋搵「鉛頭」，蛇都死喇。

一句講晒，公屋地盤亦中招，鉛禍危機何時了。計太一叮話齋，立法會不妨以特權法徹查事件，一來揪出「鉛兇」，保障市民食水安全，二來搵出失職官僚，防止香港淪為「危機之都」，叮！