香港國術總會會長王嘉恩（Albert）、副會長周國豐（Brandon）聯同詠春師傅江志强，聯手編纂一本講述城中不同武林門派嘅著作《武林薈萃》，新書發布會當日，多位本地武林名宿與政商名人都有捧場，其中冠忠巴士集團董事鄭敬凱（Andrew）及太子珠寶鐘錶執行董事朱鄧麗萍，原來佢哋都同武術好有淵源。

江志强（左起）、王嘉恩、周國豐聯手編纂《武林薈萃》。

Andrew都係習武之人，年少時受李小龍影響，十五歲拜師學習五組拳，二十多年都有持續鍛煉拳法與氣硬功。佢話，習武後明白到拳腳可以傷人甚至攞命，為免惹禍凡事都會三思而行。而朱鄧麗萍亦同武術好有淵源，佢話爸爸係武術教練，童年時常要清晨六點起床，隨爸爸到九龍公園習武，因佢嫌習武刻苦，長大後轉向商界發展。

Albert嘅老友、立法會議員陳克勤就話好佩服習武人士嘅體格同意志，佢憶述數年前參選時，有人提議佢同黨友劉江華以舞獅嘅形式宣傳，結果佢舉起沉重嘅獅頭即雙手發軟喎。