後政改時期，香港政圈多咗唔少新勢力，民主黨前立法會議員黃成智為首嘅搞咗「新思維」，強調自己代表溫和理性，反對暴力激進；尋日又輪到瞓身撐警、近日一襲水手校服裝震撼政界嘅李偲嫣宣布創辦「正義聯盟」黨，不過，兩個新政黨都標榜要行「第三路線」，但出拳方向都係泛民政黨。嘩，第三條路線咁多人爭住行，咁好景咩？

寸泛民有肥佬黎照住

我哋早前先同大家講過，成智同白鴿好友狄志遠去咗台灣集思新黨路向，轉個頭，佢哋已經公布新黨名稱叫「新思維」，目標喺日益激化嘅民主黨、公民黨手中，（界刂）走一至兩成嘅中間派選票。據悉該黨有意同定位為論政平台嘅「民主思路」加強合作，仲希望想參選嘅「民主思路」成員加盟「新思維」，想做研究嘅就繼續留喺「民主思路」，情況就好似現時新民黨同匯賢智庫嘅關係。不過，由於註冊及籌款需時，預計「新思維」將趕唔切喺十一月區議會選舉前成立，但肯定會派人參加明年九月嘅立法會換屆選舉。

講完呢黨，輪到由李偲嫣擔任主席嘅「正義聯盟」黨，佢哋尋日搶閘成立，李仲手執象徵正義嘅寶劍道具，佢哋號稱已吸納約一千六百名黨員，咁講嘅話，即係仲多過民主黨同公民黨加埋！又係走「第三路線」嘅佢哋講明，同現有嘅建制派政黨嘅最大分別係「行動派」及「做到嘢」。李偲嫣講到未來兩場選舉時大賣關子，只係話「邊區有垃圾就去邊區，我哋專掃垃圾」。至於經費，李就話佢哋係最窮困嘅政黨，皆因佢哋唔似啲泛民政黨咁，有壹傳媒集團前主席黎智英做金主照住。呢個黨咁惹火，政壇真係好戲連場！