立法會泛民政黨成員每逢周五都會食住飯盒開會，期間交流協調吓議會內外大小事務，呢個俗稱「飯盒會」嘅組織，近年設立召集人，二○一二開始，由泛民不同黨派代表輪流出任飯盒會召集人，第一年係白鴿黨主席劉慧卿、第二年係民協馮檢基、第三年係公民黨黨魁梁家傑，嚟緊一年、亦即現屆立法會最後一個立法年度，就輪到人稱「雞仔蘭」嘅工黨何秀蘭，不過，召集人換來換去，品評卻係愈換愈衰。

有泛民中人指，劉慧卿在會內處事公道，會後面對記者應講則講，唔應講嘅就一定唔講，深得各黨派代表敬重。而馮檢基，有人就質疑他為求博出位及爭曝光，任內多次將一些不應外洩嘅飯盒會內容及泛民機密，披露給傳媒甚至政府官員。輪到梁家傑，不少泛民成員及記者都不滿他太惡太霸道，在會內一言堂，在會外唔係無料放，就係鬧記者，又試過錯誤引述其他黨派的立場和行動，做到尾段可用「犯眾憎」嚟形容。

口碑麻麻 主見太強

新一年「接波」嘅雞仔蘭，過往佢都做過飯盒會召集人，但口碑就麻麻，主要係太主觀及主見太強，唔懂得尊重及協調不同意見。建制派早前考慮湯家驊辭職後嘅內務委員會副主席人選時，向泛民表明一定不會接受雞仔蘭，原因正係覺得她「有交嗌、冇偈傾」。雞仔蘭亦有多次鬧記者紀錄，尤其係女記者，對男記者就好好多，令人覺得飯盒會召集人愈換愈衰。

值得留意嘅係，自○三年區議會選舉觀龍樓一役，雞仔蘭與建仔葉國謙成為世仇。雞仔蘭今次重掌飯盒會，肯定又會與其「對口單位」、建制派「班長」葉國謙擦出火花，令兩大陣營的議會協調工作難上加難。