公共泳池噴墨 香港黑氣纏身

尋日朝早之嘛，葵盛泳池主池、副池同跳水池突然噴出大量黑色污水，短短幾分鐘就染黑成個主池，仲快過染髮劑，都咪話唔得人驚。當時池中大約有二十名泳客，好多人都唔知發生乜嘢事，直到救生員通知至急急疏散。泳池事後貼出告示，話係因為過濾系統出現故障，相信黑色污水係過濾系統中嘅活性碳造成喎。

游游吓水突然發現置身「黑海」，真係諗起都毛管戙。正如有醫生話齋，雖然人體經腸道吸入活性碳問題唔大，但如果經呼吸道大量吸入肺部，活性碳可能會依附喺肺黏膜上，導致肺部發炎或呼吸唔暢順，絕對唔係講玩o架。康文署甩甩漏漏，泳客貼錢買難受，唔嬲就假。

其實，公共泳池出名污糟邋遢，今次污水事件只係冰山一角咋，以前曾出現紅蟲、雀鳥、老鼠甚至糞便，五花八門，無奇不有，游水隨時游到入醫院。最難頂嘅係，近年康文署經常同救生員互扯貓尾，郁吓就發起工業行動，仲要次次揀正夏天游泳旺季至罷工，搞到三日唔埋兩日就要封池，泳客無所適從，怨聲載道。你話嘞，如果唔係康文署管理無方，內部溝通出現問題，又點會搞成咁吖。

講真，康文署烏龍百出，點止泳池管理不善咁簡單。好似種樹咁吖，唔係種錯品種搞到要推倒重來，浪費公帑，就係護樹不力導致危樹處處，埋下一個又一個都市炸彈，市民真係多得佢哋唔少。

見微知著，康文署官僚渾渾噩噩，成個港府何嘗唔係行屍走肉吖。鉛水風暴愈演愈烈，出事屋邨愈揭愈多，豪宅都中招，居民人心惶惶，家陣莫講話未搵到解決辦法，連問題源頭都未搞清楚，問你服未。

講開又講，風水學有所謂「望氣術」，一個人又好，一個地方都好，有冇運行，睇氣色就知。例如紅氣主巨富，紫氣代表生貴子，至於黑氣咯喎，唔使問阿貴，梗係代表冇運行喇。所以話，人衰行路打倒褪，香港近年好似撞咗邪咁，政治、經濟、民生問題多多，連百年學府香港大學亦烏煙瘴氣，委任一個副校長都搞到滿城風雨，甚至引發學生暴力衝擊校委會事件，公共泳池噴墨，咪就係香港黑氣纏身，福地變亂地嘅寫照囉，叮！