身兼香港潮屬社團總會秘書長嘅葵青區議會主席方平最近睇落清減咗，尋日我哋見佢着咗件修身嘅西裝，狀態唔錯。傾開先知佢都好貪靚，佢八、九年前已開始耍吳家太極，條腰由最高峰嘅三十八吋，減到依家得三十二吋。方平仲話佢個太極師傅已九十幾歲！睇嚟耍太極唔止可以減肥，仲可以長壽。

方平

除咗耍太極，方平對飲食亦好講究。佢以前朝早食粥，依家就改食麥皮，午餐食沙律，夜晚若返屋企食，就會食番薯同一大盤菜。不過實情係夜晚應酬多，一個月得幾晚食到住家飯。外出食飯容易肥，佢都有招數應付，就係唔會食多過三道菜，趁在場人士飲得開心時就偷偷離場啦！

第一手消息請下載on.cc東網iPhone/iPad/Android/Windows Phone Apps