城中鏡：陳嘉容赴滬進修演講
名模趙嘉懿昨日為時裝比賽擔任評判，透露同囝囝去咗上海旅行，但因十四個月大嘅囡囡未申請回鄉證，所以要留港照顧，佢話：「佢哋大得好快，囝囝讀書幾好，鋼琴、唱歌、打鼓都好好、暑假仲學埋小提琴，係佢鍾意我先畀佢學，我唔係怪獸家長。不過，佢開學功課就會好多，有時幫佢溫習功課，我自己覺得好大壓力，反而佢冇嘢。」
趙嘉懿（左起）、陳嘉容同張學潤型爆合照。
同樣擔任評判嘅名模陳嘉容就透露將會到上海學習演講技巧，佢話：「增值自己對教人扮靚開班好有用，今次到我做學生，想變演講高手。」提到感情，佢直言今年係桃花年，好多人追：「好旺桃花，不同國籍都有，大過我細過我都有。」介唔介意姊弟戀？佢話：「我覺得溝通到又舒服就得。」
轉頭見到張學潤，佢話將推太陽眼鏡系列，佢話：「同一個國際品牌合作，我設計咗四款，定價唔會太貴。」
