城中鏡：擅泳世家
仲記得已故全國政協副主席霍英東長孫霍啟剛講過，爺爺日日督促佢游水。尋日啟剛爸爸兼港協暨奧委會會長霍震霆出席一個活動時，自爆佢嘅寶貝孫仔中曦遺傳咗佢媽媽郭晶晶嘅天分，已開始踢吓水。仲話中曦好黐佢，前排就忙住幫個孫搵好學校，嚟緊就要開學喇，自己都有啲戥孫仔緊張喎。
霍震霆話個孫都要學吓游水。
袁武話未聽聞中總下屆會否有新立法會代表。
左起：方添輝、楊華勇同羅永邦係中總新生代。
感乖孫有運動天分
霍震霆講起個孫就一副慈祥爺爺咁款。佢話啱啱同寶貝孫仔喺吉隆坡返港，事關佢去投票支持北京申辦冬奧及冬殘奧會。霍家一向支持運動，霍震霆自細就勤練游水，啟剛亦係，依家個孫未夠兩歲都開始習泳，難怪霍震霆好自豪，話覺得中曦都有啲運動天分！
同場仲有中華總商會副會長袁武。早排發生政改表決「甩轆」事件，建制派議員嘅表現飽受責難，政圈預計明年選舉將會洗牌。袁武就話未聽聞中總會有新嘅立法會代表，而且選舉係明年嘅事，目前言之尚早。
中總常務會董楊華勇、會董方添輝、中華廠商聯合會名譽會長羅富昌同兒子Ben羅永邦都有到場。楊華勇嘅細仔下星期一將入讀幼兒班，佢話早前同太太一齊陪囝囝搵學校，好彩幾順利，冇遇到古靈精怪嘅問題。羅富昌就話阿Ben雖然已返家族幫手打理生意幾年，但係佢仲未可以退休。
