繼香港電訊上月底推出「拍住賞」流動支付服務，由董事總經理艾維朗領軍跳入新戰場，數碼通尋日都拿拿臨搵公司靈魂人物，即是總裁Douglas黎大鈞親自上陣推介手機網上營銷平台「KISS」。Douglas今個月尾就Last Day，同數碼通Say Goodbye，今次全力出擊做到底。

黎大鈞尋日活動上滿場飛Sell 「KISS」。

「KISS」實際推出時間仲未知，但Douglas講明，唔理係咩電訊商用戶都用得「KISS」，又話iOS同Android系統嘅手機用戶只要安裝「KISS」App，將「KISS」帳戶與銀聯卡連繫，就可以喺實體店用手機付費。數碼通今次擺明要顛覆傳統零售，可算係Douglas臨別前嘅代表作。

Douglas尋日一身Smart Casual裝束，好似輕盈咗喎，佢就梗係一貫咁自信咁話「不嬲都咁Fit」。佢退任後有乜大計？呢樣佢相當口密點都唔講，但來賓爭住要同佢影相集郵，佢都無任歡迎。