上水梧桐河畔農地兩年前出現一列約二千平方呎恍如豪宅別墅嘅鐵皮屋，被業主分隔成十多個單位分租，面積一百八十平方呎單位月租索價五千元，較毗鄰豪宅呎租仲貴一倍。地政總署四個月前雖已向業主發警告信，卻淪為「無牙老虎」，原址對開空地竟續有更大更豪華嘅鐵皮屋擴建。地署放軟手腳，縱容農地寮屋變身豪華鐵皮屋，事件曝光之後仲歎慢板乜都唔做，署長甯漢豪再係咁視若無睹，小心頂官帽呀。