食衞局年初檢討小販及墟市政策，喺三月向區議會提出「由下而上」嘅建議。深水埗區議會早前終於通過，喺九江街同海壇街交界嘅閒置用地，舉辦為期一個月「尋生活－深水埗基層見光墟」試驗計劃，每逢周日舉行，畀有需要者經申請後喺墟內擺地攤，售賣各色物品，包括一手及二手衣物、電器及雜貨等。呢個計劃畀基層名正言順擺地攤賣嘢，自力更生，但係呢個咁惠民嘅政策咁遲先推出，好明顯就係因為官僚作風阻撓，局長高永文真係要諗吓點樣拆牆鬆綁。