搞清潔一時興起 洗後巷依然做騷

唔係太一叮有偏見，實情係連高永文自己都承認，落區洗太平地只係象徵式，冇可能日日咁做，目的係起示範作用，引起市民關注街道清潔喎。即係咁，高官落區做騷，市民早就見怪不怪，但求做得好好睇睇就算數，可惜吖，有街坊踢爆，高官落區前已經有人做咗嘢，一早將條街洗得乾乾淨淨，連做騷都做得咁假，難怪冇人睇好港府真係可以搞好衞生嘞。

咁又係呀，「全城清潔大行動」已經唔係第一次舉行，自從沙士後，港府隔三差五就搞一次，例如○九年豬流感及一三年沙士十周年都搞過，次次都係有頭威冇尾陣，衞生黑點至今依然存在。呢，早前有政黨公布全港七十六個衞生黑點，本報記者跟進調查，發現大部分都係○三年已經存在，直到今時今日仲係垃圾堆積如山，臭氣熏天，就知當局搞衞生有幾多誠意喇。

香港話就話係國際大都會，其實藏污納垢，烏煙瘴氣，講起都醜怪。莫講話後巷呢啲不見天日嘅地方蛇蟲鼠蟻橫行，就算係大街大巷，一樣滿街垃圾，建築廢料隨處可見。咁仲唔止，郊區及海灘一樣污糟邋遢，早前至有環保團體踢爆海上垃圾問題嚴重，石澳鶴咀「垃圾灣」更加係重災區，廢物多達一百八十五噸，足足要四十六架四噸垃圾車先至可以運走，問你怕未。

搞成咁，咪就係因為政府部門平時聽之任之、關人個關囉。人都要日日沖涼喇，地方一樣要時常清潔，港府平時唔燒香，臨急抱佛腳，環境衞生點會好喎。講真，港府每次清潔行動都難以持久，爭取政績多過解決衞生問題，加上未有加強巡查及檢控，垃圾蟲點會減少吖。難怪有人質疑搞清潔根本就係政治騷，目標係年底區議會選舉，唔係冇道理。

呢排香港好似撞邪咁，唔止政治爭拗多多，民生問題更係一浪接一浪，鉛水風波未解決，又輪到醫院爆發霉菌恐慌，證明港府所謂民生無小事只係大隻講。點都好喇，清潔香港必須持之以恒，淨係靠做騷，盞嘥氣嘅咋，叮！