計下日子，原民政事務局局長曾德成被「炒魷」已近兩星期，但發現民政事務局網站首頁驚現兩名局長，網頁正中間可見新任局長劉江華嘅照片，而左邊欄目中卻有一個標示寫着「曾德成局長隨筆」，按下標示後，分頁載有曾德成多年嚟撰寫嘅網誌。曾德成已經喺上月離任，驟眼一睇隨時誤以為民政事務局有兩名局長。

民政事務局網頁除咗新局長劉江華外，左邊欄目亦有「曾德成局長隨筆」標示。（互聯網圖片）

劉江華打乒乓波打到O晒嘴。

民政事務局發言人解釋，早前諗過點樣處理以前曾德成嘅隨筆，得知有市民仲想睇曾德成嘅舊網誌，所以喺左邊欄目保留咗個標示，以便市民查閱，至於劉江華就暫時未有計劃撰寫網誌嘞！其實為免混淆，局方為何不改作「曾德成前局長隨筆」呢？或是另有原因？

講起劉江華，佢尋日就趁康文署舉辦全民運動日，到咗香港公園視察，順便做埋運動，佢同一班中年婦女、播住韓國組合少女時代歌曲跳全民健體操，玩得不亦樂乎，佢之後又玩毛巾健體操，全程又扭又揈。

戲肉就係佢同傷健人士乒乓球運動員合作雙打，佢喺一分鐘比賽中抽咗幾下板，仲打到「O」晒嘴，期間有贏有輸，但最後以一分飲恨，事後局方喺社交網站就以「劉華局長」稱呼佢。

唔知係咪做完運動，頭腦清醒，事後有傳媒問劉江華點睇港大委任副校長風波，劉華局長就乘機硬銷全民運動日，話運動令市民少啲爭拗喎。