政府高層上月大地震，原民政事務局局長曾德成同原公務員事務局局長鄧國威名為離職，實為「炒魷」，震動整個政圈。鄧國威離任後尋日首度接受電台訪問，自爆本擬工作至一七年，但世事發生得好快，請辭決定嚟得好急，同事亦未能預計。講到離職原因，佢話係「預計不到嘅家庭理由」，但又唔係家人出問題，理由牽強，難令人信服佢唔係被「炒魷」。

鄧國威在任三年間，喺處理公務員薪酬同延長退休年齡等問題上，被指態度冷漠，與多個公務員團體關係惡劣，導致警隊及紀律部隊評議員會喺前年退出薪酬趨勢調查機制。對於有指兩局長因工作不力「被炒」，鄧國威話離職係因為出現「預計不到嘅家庭理由」，但又唔係某一位家人出現問題，只係想「多啲時間」陪伴所有家人，強調家庭平安，自己身體亦冇問題喎，但何解陪伴家人係「預計不到嘅家庭理由」呢？

「唔記得考慮咗幾耐」

至於被問幾時開始考慮提早退休、特首有乜嘢反應時，鄧國威就話「唔記得考慮咗幾耐」，兼指事情已經過去，唔想「講得太多」，只強調自己確實有提出請辭，而特首亦關心公務員士氣，佢又聲稱已「盡咗力」，三年來工作問心無愧。

喺政府工作咗三十多年，鄧國威話「執嘢」都要時間，但早前已經「執好」，待稍後運送回家，退休後會多旅行和做義工等充實生活。一般局長任期五年，現時提早退休，佢話心態上需要調整，指會規劃一吓退休生活。

至於坊間指鄧國威未能令公務員隊伍「人心回歸」，佢話公務員應保持中立，行事公平，向政府提出客觀及全面的意見，非不能發表政治言論，但發言時要注意不能令人感到執行職務時會有偏頗，且不能與工作有直接衝突。佢又話舊年佔領行動期間曾苦惱如何劃界，但過去公務員都安分守己，唔會倒米，而自己責任係維護公務員核心價值，與公務員相處上擇善固執。