護士畢業變失業 資源錯配添亂象
公立醫院護士人手長期短缺，搞到十個煲七個蓋，醫管局次次都話增加撥款、增聘人手，實情係點呢？講都冇人信，原來呢邊有工冇人做，嗰邊有人冇工做，尤其係精神科護士，好多人畢業變失業，簡直匪夷所思。
嗱，醫管局本年度接獲一百八十六名應屆精神科護士畢業生求職申請，包括一百零七名註冊護士，同埋七十九名登記護士，結果首階段獲聘嘅註冊護士只有六十九人，三分一落選，而登記護士更係重災區，只有七人被取錄，九成護士畢業生冇工做，問你怕未。
點解會咁？醫管局指首批招聘嘅護士主要用於填補上年度流失人手及應付新增服務喎，言下之意，上年度人手流失減少，所以請人咪少咗囉。事實係咪咁，睇吓數據至講喇，最近幾年精神科護士流失率維持百分之三左右，並無明顯增減，醫管局前個年度錄取應屆畢業生嘅比率高達九成，上個年度亦超過八成，反觀本年度直線下跌，證明所謂人手流失減少根本係藉口。
正如立法會議員話齋，護士畢業生獲聘人數突然大減，歸根究柢係醫管局縮得就縮，卸得就卸，精神科冇新增服務所致。關注團體亦指出，社會對精神健康服務一直有好大需求，無奈當局善財難捨，唔肯增加資源，支援服務少之又少，好多病人只能自生自滅，唔怪得經常發生悲劇喇。
當然，精神科登記護士之所以成為失業重災區，除咗醫管局縮皮，另一個原因係學歷及專業水平不如註冊護士，令競爭力下降。有畢業生歸咎於太多院校開辦同類課程，一味濫收學生，淨係識收學費，學生出路就關人個關。咁又係吖，現時培訓精神科護士嘅院校包括理工大學及公開大學，而社署又同青山醫院合辦登記護士課程，搞到僧多粥少，學生成為犧牲品。
所以話，當局根本係亂點鴛鴦譜，公立醫院前線人手普遍短缺，好多科嗌晒救命，唯獨精神科護士畢業變失業，呢啲咪就係資源錯配囉。前朝貪曾政府好大喜功，將醫療視為賺錢產業，導致家陣供求失衡，連過去被視為「錢途無限」嘅醫護行業都冇啖好食，簡直累人累物。
點都好喇，醫管局管理混亂，資源錯配，搞到公立醫院問題多多，烏龍百出，再唔正視問題，唔通真係要逼到護士睇精神科咩，叮！
