香港貿易發展局尋日為下月同期登場嘅四項展覽舉行宣傳騷，包括美食博覽、家電及家品展、國際茶展、中醫藥及健康產品展覽，幾十間參展商同名人都去趁熱鬧。潮流吹健康風，現場熱銷嘅新產品多數主打健康概念。喺公仔箱教煮餸多年嘅名廚李錦聯都有到場，佢都話咪以為教師奶煮家常菜好簡單，亦唔係睇番幾年前舊片學煮餸就得，查實依家個個都話要少油少鹽，煮法大不同喎。

李錦聯以趣怪打扮現身。

ArDis（右）盛讚梁輝雄煮嘅蛋白杏仁茶。

黃家和（右）同小野村拓志好老友，但就未試過一齊唱Ｋ。

李錦聯一身富有夏威夷色彩嘅花花恤衫同短褲打扮，頭戴又黑又攣嘅爆炸假髮，腳踢人字拖到場，唔睇真啲，差啲認唔到佢。佢現身幫日本沖繩某海鹽品牌做代言人，難怪咁浮誇喇！現場有唔少參展商趁鉛水風波推銷健康補充劑、礦泉水等，腦筋轉得認真快。

ArDis做美食博客

香港咖啡紅茶協會主席Simon黃家和一見到日本貿易振興機構（香港）所長小野村拓志即上前打招呼。Simon爆料話小野村好唱得，但相識多年未曾同佢唱K，所以要趁小野村下月調離香港前，要唱番場Ｋ喎。

同場仲有樂善堂副主席楊小玲大女ArDis，佢同海景嘉福酒店中菜行政總裁梁輝雄好好傾，ArDis盛讚梁輝雄煮嘅蛋白杏仁茶極之幼滑好味，好值得推介。原來ArDis除咗幫媽咪嘅美容生意做網上推廣之外，亦因幫手寫媽咪嘅私房菜食譜，而勾起佢做美食博客嘅興趣，得閒仲會教小朋友煮嘢，依家仲籌備緊出本旅遊美食書添！

第一手消息請下載on.cc東網iPhone/iPad/Android/Windows Phone Apps