明年舉行新一屆嘅立法會選舉,今屆冇參選立會嘅白鴿黨前黨員、前議員「橡筋褲」鄭家富就已表明有意捲土重來,重奪新界東議席。而最近被白鴿黨踢出黨嘅前議員黃成智亦講明會籌組新平台參選各場選舉,加上泛民主派將力保現有六個議席,估計屆時將會上演一場泛民八男子大混戰。不過,喺僧多粥少下,恐怕會血流成河,當中至少兩至三人會落敗。

(設計圖片及對白)

橡筋褲成智夾擊 新丁挑戰大

一○年因不滿白鴿黨對政改立場而退黨嘅橡筋褲如果復出,估計都會選擇喺番新界東。而新界東亦都係成智多年努力經營嘅地區,佢出戰嘅選區,相信亦非呢區莫屬。喺橡筋褲同成智夾擊之下,相信傳統泛民都要好好審時度勢,特別係白鴿黨面對兩個舊黨員搶票,危機四伏。

盛傳白鴿黨主席、立會新界東議員劉慧卿下屆將會退落嚟,讓位畀該黨總幹事林卓廷。而退出公文袋並已宣布辭職嘅立會議員湯家驊,佢嘅新界東議席預料會由公文袋新界東支部主席楊岳橋頂上。至於新界東「票王」、社民連議員「長毛」梁國雄亦都有意交棒畀佢哋嘅內務副主席黃浩銘。三位新丁知名度都遠比原議員低,相信面對橡筋褲同成智,對佢哋都係好大挑戰。

除咗泛民新丁有難度外,得到橡筋褲力撐而當選新界東議員嘅新民主同盟范國威都應該幾頭痕,因為佢除咗一直被同樣都係西貢區議員嘅方國珊狙擊外,路線偏向激進,亦係激進派人民力量議員「慢必」陳志全嘅對手。再加上預料會角逐連任嘅工黨現任新界東議員張超雄,泛民八男子大混戰,最終成王敗寇,睇嚟都要埋身肉搏過先知喇!

第一手消息請下載on.cc東網iPhone/iPad/Android/Windows Phone Apps