政壇：IC撐體育城疑被勸停

立法會財務委員會喺暑假前，啱啱好趕得切通過啟德體育城前期工程撥款。據了解，原來通過之前，IC曾經希望以演藝界都支持興建體育城為由，撰文力撐有關撥款申請，仲問民政事務局攞資料添！不過，好心唔一定做到好事，事關啟德體育城一直被質疑，起好之後，分分鐘會用嚟開演唱會，未必幫到體育界。

民政事務局相信體育城可以幫到體育界提供多啲場地訓練，一直想避免有關演唱會嘅質疑成為輿論焦點，加上計過財委會應該夠票通過撥款，本住「沒有新聞就是好新聞」，希望最好就咪提咁多啦，點知IC竟然想撰文，挑起演藝界支持啟德體育城，明顯同局方策略唔同。

結果局方都整理咗背景資料，同以往討論嘅重點畀IC參考，但最終佢篇文都冇出現。未知係咪被更高層嘅人勸停咗。記者曾嘗試聯絡佢，但佢未有回覆。