政壇：政黨抽水攞彩 街坊惶恐
呢排幾乎日日都有政黨開記者會講抽驗鉛水，但唔同黨派喺同一個地點抽驗嘅水都可能有唔同結果，呢個黨話有超標、嗰個黨話冇超標，各黨仲鬥抽得多水辦、檢驗方法有幾嚴謹，仲指摘對方驗得唔準，搞到居民人心惶惶，都唔知信邊個好？
（設計圖片及對白）
喺白鴿黨立法會議員「一舊雲」率先爆出啟晴邨鉛水風波後，隨即掀起抽水潮，好似喺牛頭角下邨，白鴿黨同建仔就抽水大鬥法。白鴿黨七月中發現，十個水辦樣本有三個含鉛量超標，但建仔就指摘對方驗得太少水辦，「挑機」做足二十四個樣辦，之後話全部冇超標，仲派單張叫居民「安心飲用」添！最後政府公布牛下有水辦含鉛量超標，令建仔先輸一仗，驗水嘅可信程度受到質疑。建仔當日由立會九龍東議員「橄欖」陳鑑林公布結果添。
繼牛下之後，兩黨喺大埔再次短兵相接。白鴿黨之前驗出大埔廣福邨，有樣本重金屬鎳含量超標近四倍。建仔尋日屢敗屢戰，再次挑機，公布大埔廣福邨同宏福苑嘅驗水結果，九十個樣本中，只有一個水辦鎳含量超標一微克，但清洗水龍頭節流器之後，再驗就冇超標。
工聯會寶盈花園參戰
建仔隨即被質疑早前喺牛下驗水都唔準，佢哋就話對今次結果有信心，又叫居民放心飲用，唔使擔心，仲要批評白鴿黨個化驗結果不負責任，叫住戶隨意攞水樽抽水，就算發現超標都未必準確，但係就搞到居民好擔心，唔敢飲水喎。
抽水戰線亦由建仔蔓延至工聯會，白鴿黨之前喺將軍澳寶盈花園，驗出有一個水辦含鎘量超標，工聯會就抽足三十二個水辦，全部抽隔夜水，但係完全冇超標，質疑白鴿黨嘅結果造假，又話問過對方邊個單位水辦超標，但係人哋唔肯話佢聽喎。
