主婦被迫離職場 鼓勵生育大隻講

呢，統計處針對家庭主婦就業意向調查發現，八成三婦女唔會繼續工作，主要原因係需要「處理一般家務」及「照顧家庭成員」，只有百分之六願意重投勞動市場。值得留意嘅係，調查中約七成七人曾經工作，離開職場平均達十年，換句話講，好多主婦唔係唔想工作，而係因為要照顧年幼子女而不得不離開職場。

正如婦女組織話齋，唔少基層家庭面對經濟壓力，家庭主婦本想外出工作幫補家計，可惜家中有年幼子女需要照顧，又無法支付高昂託兒服務費用，惟有打消工作念頭。所以話，好多家庭主婦只係因為分身不暇，無法投身職場，唔怪得勞動人口買少見少，連出到高薪都請唔到人洗碗喇。

所以話，做女人難，做基層主婦難上加難。本港現時約有十萬名兩歲以下兒童，但港府資助託兒名額得一千個咁大把，比例係一比九十九，仲難過申請公屋咁滯，部分地區好似觀塘同黃大仙咁，更加冇資助託兒服務添。你話嘞，家庭主婦無法投身職場，港產官僚有冇責任吖？

真係唔明官老爺諗緊乜，增加資助託兒服務，釋放婦女勞動力，既可以幫到基層家庭，又可以幫到僱主，更加可以幫到香港，可謂一舉多得，何樂而不為？開講都有話喇，錢可以解決到嘅問題，就唔係問題，何況港府窮到只剩下錢。當局成日擔心人口老化，經常鼓勵市民生育，家計會最近仲推出全新廣告叫大家生夠四個甚至五個，組成一支籃球隊喎。問題係，港府口惠而實不至，連增加託兒服務咁小嘅事都唔肯做，叫市民點放心生育吖？生咗一支籃球隊出嚟，邊個負責養育吖？有人話培養一個子女需要四百萬元，有幾多基層家庭負擔得起吖？

最好笑嘅係，港府以為做啲門面工夫，好似增加雞碎咁多子女免稅額咁，就話係鼓勵市民生育，都唔知好笑定好嬲。老實講吖，基層主婦因為照顧年幼子女而無法外出工作，家庭少咗一份經濟收入，多多免稅額都補唔番喇。

咪話太一叮唔提醒，隨住社會老齡化問題日益嚴重，勞動力不足問題只會不斷惡化，港府再唔盡快諗辦法解決，問題遲早爆煲嘅咋，叮！