香港青聯向來被視為中華全國青年聯合會（全國青聯）嘅對口單位，按照過去不成文嘅安排，向來港區有兩個全國青聯副主席名額，過去幾乎清一色由現任或前任香港青聯主席出任，但五年前已開始打破傳統，曾任香港青聯副主席嘅新世界發展執行副主席鄭志剛，步步高陞成為全國青聯副主席，當時另一副主席為「製衣大王」陳元鉅兒子陳仲尼。

（設計圖片及對白）

事隔五年後，全國青聯最近完成換屆，除咗鄭志剛連任副主席，菁英會創會兼榮譽主席Jaime施榮忻則接替陳仲尼成為新任全國青聯副主席，資料顯示今次係近十年以來，首次兩名全國青聯副主席都冇做過香港青聯主席。

政圈分析Jaime上位之謎，一係佢喺過去近十年做青年工作無功都有勞，首先於○七年中創立菁英會，其後又曾任百仁基金主席，係少數曾分別出任兩個青年組織負責人。另一關鍵因素係施家被指喺舊年反佔中一役表現突出，加上施家所屬嘅福建幫更係出錢又出力，喺天時地利加上人和下，造就Jaime今次成功上位。

至於被指大熱倒灶、今年中卸任香港青聯主席嘅霍啟剛，有政界中人估計今次結果對佢嚟講未必係壞事，反而可能「進可攻，退可守」，一方面喺全國青聯層面，啟剛今年只係三十六歲，預料五年後仍有機會做全國青聯副主席。另一方面，啟剛或可能提早於政界拾級而上，可能喺數年後人大政協換屆時進入有關跑道，有人更估計如獲祝福出戰立法會亦非冇可能。不過，政治一日都嫌長，究竟啟剛有冇新嘅規劃，就要留待時間驗證嘞！

第一手消息請下載on.cc東網iPhone/iPad/Android/Windows Phone Apps