政壇：入投行實習日做18粒鐘

畀得條捷徑你入行，當然亦用到你盡，一個星期做一百一十粒鐘閒閒哋，當你星期日有假放，亦每日做超過十八粒鐘。

攞命？冇錯，真係有人冇咗條命，兩年前有個交換生喺倫敦美銀美林做Intern，連續三晚通頂後，唔見咗人，原來喺宿舍浴室入面死咗。

之後高盛喺美國即刻帶頭「保護」啲Intern，禁止佢哋星期六留喺公司，其他大行都有酌量跟。不過若然Intern幾咁想星期六返公司開工、唔想受「保護」，只需向公司申請就得。

今年行情又點？有個分析員Intern話開工第一日就踩到凌晨兩點半，之後好啲，只不過係晚晚收十點半、十一點半。有個美國大摩Intern就話一星期冇一百一十粒鐘咁誇，依家九十粒鐘之嘛。等等，星期六唔開工，九十除開咪又係一日十八個鐘！