政壇：鄭文聰力撐成立創科局
政府喺立法會十月開波會就成立創新及科技局再闖關，香港工業總會尋日選出新一屆理事會，環保工業出身嘅鄭文聰接替劉展灝任工總新主席。鄭文聰一上場，即開聲力撐成立創科局，話香港工業必須擺脫過去嘅代工模式，走科技路線就係其中一條出路。佢認為創科局給予科技發展一個方向同指引，又話雖然目前有志於數學同科學嘅大學生唔多，但觀乎大學有機械人參與國際比賽，工業學院嘅太陽能車揚威海外，所以香港要發展科技，都仲有一定嘅實力。
鄭文聰一上場，就力撐成立創科局，為工業界搵多條出路。
至於上場後有乜嘢大計，鄭文聰話除咗要協助工業界升級轉型以應對全球化之下嘅劇烈競爭，仲會發揮自己專長，幫助會員適應愈趨嚴格嘅環保法規。佢話內地最新嘅環保罰則，最高刑罰係判處死刑！為免誤墮法網，真係有必要提升大家嘅環保意識。
鄭文聰話二十年前剛投身環保行業，唔少人都以為係負責倒垃圾，因為當時好多垃圾車都自稱係「環保公司」，但其實環保行業係涉及好多科技元素同創意。雖然國內嘅環保法規愈嚟愈嚴格，但只要做多啲培訓，咁就唔怕踩中地雷喎。
