打工好抑或創業好?若然真係想創業,要趁自己仲曉駁嘴無識死,就好去闖。連乜都見過晒嘅資深Banker都係咁講。恒生執行董事兼零售銀行及財富管理業務主管Nixon陳力生尋日自爆話,後生嗰陣都有創業諗頭,後尾愈做銀行就愈細膽,創業夢咁就變咗句號。

陳力生自爆做銀行做得耐,愈做愈細膽唔敢創業。

話說恒生同善導會搞咗個青年創業計劃,Nixon做主禮嘉賓,仲好坦白咁講佢嘅經歷畀大家聽,佢十八、廿二嗰陣打算過創業,但諗住自己冇乜嘢經驗,就先去銀行做吓先,順便儲吓彈藥,點知愈做愈無膽,幾咁驚蝕錢,搞到一路都唔敢創業,卒之一做就做咗三十九年。創業?再冇諗過。

Nixon冇行創業條路,都一樣有今時今日,喺台上以主禮嘉賓身份,冇有怕咁講佢當年「幾無膽」,佢當年創唔創業都冇乜所謂。

講開又講,重視企業責任嘅唔止恒生,中銀香港嚟緊亦會推出企業環保領先大獎,表揚吓香港同泛珠三角啲優秀企業,仲會設個「一帶一路」有關嘅特別獎添,同國策幾咁配合住。

第一手消息請下載on.cc東網iPhone/iPad/Android/Windows Phone Apps