近日有本港歌手新歌被指抄襲外國歌曲,呢股疑似抄襲風最近由娛樂圈吹到政圈。我哋收到投訴,指白鴿黨葵青區疑似區議會參選人團隊嘅「為葵青搏盡!」宣傳海報,由口號、設計以至字體,均與元朗足球會沿用多時的宣傳品極為相似。細問之下,原來葵青團隊只係「抄上抄」,真正抄襲「源頭」嘅係白鴿黨創意媒體部,新裝修嘅白鴿黨太子總部大門,亦有一幅類同嘅「為香港搏盡!」大型布景板。

(設計圖片及對白)

元朗足球會嘅宣傳口號設計「為元朗搏盡」,已沿用多時。(互聯網圖片)

元朗足球會主席兼新民黨區議員王威信話,球會兩年前已經喺會刊、橫額等宣傳刊物上使用「為元朗搏盡」嘅口號,亦曾經喺巴士度賣廣告,社會上唔多人用呢句口號,但承認「搏盡」對於喺港大讀書嘅都唔陌生。佢話係咪抄襲不得而知,留待公眾評論,球會依家未有時間討論有關事件,但會研究係咪需要採取行動。

枉花700萬搞媒體部

至於被投訴有抄襲之嫌嘅白鴿黨創意媒體部領導羅健熙同黎敬瑋接受查詢時,異口同聲強調有關口號係由佢哋原創嘅,意念正係白鴿黨會為香港市民搏到盡,否認抄襲,而除咗葵青團隊之外,該黨其他嘅地區團隊亦可能沿用同一口號及設計。

即使今次宣傳海報嘅口號只係如有雷同、實屬巧合,但白鴿黨嘅所謂創意實在令人質疑,況且該黨早前豪花近七百萬元,喺荔枝角區購入一個逾千呎工廈單位做創意媒體部辦公室,理應大有作為先啱,可惜反而創意欠奉。

第一手消息請下載on.cc東網iPhone/iPad/Android/Windows Phone Apps