選舉臨近亂投遞 郵政醜聞係咁嚟

係咁嘅，日前有政黨投訴，話香港郵政最少兩次誤將對家嘅社區主任「升呢」為現任區議員，幫佢哋投遞作宣傳用嘅通函。根據規定，住戶信箱如果有「不收取通函」嘅標貼，就唔會再收到通函郵件，而現任區議員就可以豁免。你知啦，年底就係區議會選舉，唔少地區主任躍躍欲試，呢個已經係公開嘅秘密，家陣選戰都未開打，佢哋嘅宣傳品就可以偷步入晒所有住戶屋企，香港郵政明益個別政黨，唔係超級助選員又係咩呀！

話口未完，香港郵政尋日又被踢爆幫非議員嘅政黨人士寄豁免通函，證明今次事件只係冰山一角咋。之所以搞成咁，一係有人玩親疏有別，一係有人極度唔熟書，連區議員同地區主任都分唔清楚，總之就係失職喇。咪以為小事一宗吖，係人都知，選舉有「公平」原則，例如太一叮提到候選人甲，就一定要提埋丙丁戊等其他候選人。香港郵政為個別人士「助選」，擺明違規喇。

講真，香港郵政有名你叫醜聞之王，冇規冇矩又點止咁少吖。佢哋唔應該寄嘅信亂寄，應該寄嘅信又寄失。呢，淨係去年香港郵政「失信於民」事件就有成七千三百宗，賠款達二百幾萬元，唔到你唔服。

冇計喇，香港郵政管理混亂，烏煙瘴氣，有乜法子唔撞板多過食飯吖。本來，一間公司經營不善，一係精簡架構，一係改革求存。可惜香港郵政兩樣都唔做，明明業務愈來愈縮，仲要維持龐大編制不變，搞到人浮於事不特止，仲縱容員工集體蛇王兼呃OT，早排本報連環揭發香港郵政濫發兩億元超時津貼，簡直匪夷所思。

最搞笑嘅係，香港郵政幾年前委託外國顧問公司研究如何改革，點知因為對方說話唔啱聽而拒絕收貨，仲連四百萬元顧問費都想走數，堂堂公營機構居然耍無賴，搞到畀洋顧問怒斥「無法無天」，貽笑國際。立法會尋日討論呢單嘢，郵政官僚吞吞吐吐，支吾其詞，既唔肯交代四百萬元公帑去向，又唔肯公開顧問報告，梗係心中有鬼喇。

講多無謂，香港郵政管理爛到入心，醫番都嘥藥費，與其繼續浪費公帑，不如早啲自我了斷好過喇，叮！