城中鏡：廠商會工展搞免租扶「青」
工展會係廠商會每年最大型嘅活動，以往佢哋都會安排部分攤檔畀社企經營，今年就打算有新搞作，準備搞一個青年創業計劃，勝出四隊將獲免租擺檔，賺蝕就自己孭番。據知青年創業計劃初步對象係高中、大專同四十歲以下年輕人，佢哋要組隊寫銷售計劃，預計十月下旬廠商會青委會會安排創業論壇，搵有創業經驗嘅青委分享，最後會選出四隊，喺工展會最後兩個星期安排兩個攤檔畀佢哋擺檔。
李秀恒喺工展會最後兩周安排兩個攤檔畀學生擺檔。
為咗鼓勵創業，參加者唔可以買貨番嚟賣，一定要原創或自己設計。廠商會會長李秀恒話頂多只能免租，如果連營運開支都畀埋，青年人就唔會感受到做生意有風險。
另一方面，廠商會今年暑假首次安排中學生參觀大學同體驗職場生活，唔通佢哋係想打正旗號，幫政府做好啲青年議題？
