城中鏡：HKT示範拍卡過數撻Q

香港電訊旗下全資附屬嘅HKT Payment踩埋入發卡市場威盡，仲推出咗手機對手機一拍即過數畀Friend服務，但一開閘就撻Q添！

話說尋日，HKT產品開發、業務發展及卡務營運高級副總裁Alex管紀東喺台上向大家示範全港首次NFC「P2P」過錢交易，點知……仲足足拍咗三次都Fail，全人類就咁睇住台上大Mon顯示「transfer failed」（圖，紅圈示）。

唔通Alex個電子銀包唔夠錢？Alex喺台上面話「入面有八百幾蚊」。呢個時候，都係唔好問點解，畀嘉賓祝酒先。

祝完酒，再試過，Alex終於成功轉一百元畀個Friend喇，全場拍手歡呼。Alex事後話三次交易唔成功係衰「緊張手震」，所以拍唔中部電話，冷靜後再試先得。