城中鏡：月餅扶貧
仲有兩個月先到中秋節，政商界就提早買月餅行善支持內地扶貧工作，其中「快勞夾大王」、國際小母牛香港分會籌款委員會主席杜振源，率先用五十萬元認購月餅，認真大手筆，但究竟五十萬合共買到幾多個月餅，同埋要幾多人先食得晒？佢坦言冇諗過，強調實會捐出嚟畀啲有需要嘅人，等大家可開心過中秋。
杜振源（右）率先用五十萬元認購慈善月餅，葉澍堃（左）亦指值得細心品嘗。
郭少明話兼賣慈善月餅券係新嘗試。
梁錦松呼籲港人互相體諒，多啲包容。
每年中秋節前夕，除咗傳統亦總有新款式月餅面世，有啲仲會提早開賣，當中詠藜園今年決定捐出一批月餅義賣，據知係根據四款御膳秘方製作，而扣除製作材料開支，有關方面會將所得善款分別用於本地慈善同捐畀小母牛，以支持後者嘅內地扶貧工作。
葉樹堃籲港人知福
本身做開化妝品生意嘅莎莎國際主席郭少明，知今次月餅義賣咁有意義，決定下月開始喺旗下嘅化妝品零售店兼賣慈善月餅券。小母牛副主席、前高官葉澍堃認為港人要知福，因為佢曾探訪過內地山區，有當地農民透露每年只食到兩、三次豬肉，而今次義賣嘅月餅，當地人仲可能從未試過，所以呼籲大家購買慈善月餅後，真係要好好品嘗。
對今次義賣月餅，將令部分內地貧困人士受惠，國際小母牛香港分會主席梁錦松高興嘅同時亦有多少感慨，佢自言香港過往經歷多次困難時期，每次內地都願意伸出援手，因此希望港人要以同胞嘅愛來對待內地人，唔好阻礙內地人購物。佢又語重心長話香港近年來社會好撕裂同對立，希望大家互相體諒，多啲包容，香港先會更加美好。
