政壇：搞搞政：泛民18區飯盒會暗搞排擠
尋日都講過白鴿黨、公文袋、工黨同民協等「主流」泛民黨派開咗個退修營，其中一個結論係將「飯盒會」延伸至全港十八區。枱面理由係要團結泛民發掘地區議題，但有泛民中人就踢爆，其實係為咗方便區分主流泛民同一眾「傘兵」參選人，係搞排擠至真。
設計圖片及對白
荃灣區嘅泛民區議員同疑似區選參選人，最近聯手針對建制派倡議嘅社區重點項目、西樓角花園工程做咗唔少工夫，佢哋認為有啲成效，引起到社區關注，於是就提出喺十八區都搞番個類似「飯盒會」嘅合作平台。除咗現任當區區議員，各主流黨派有意參加區選嘅社區主任、社區幹事等都可以參與，唯一條件係槍口一致對外向準政府同建制派，唔可以插番自己友，仲要參與主流泛民嘅選區協調。
疑被利用「票債票償」
有泛民中人同我哋講，佔領行動衍生咗大批傘後組織，當中好多都有派人參加區選。呢班傘兵口講狙擊建制派，奪取區議會過半議席，但實際上有唔少人都同主流泛民參選人、甚至係現任泛民區議員撞區，當中又以白鴿黨最受影響，喺中西區、油尖旺同北區都出現撞區。喺單議席單票制嘅選區當中，同一陣營有兩人出選即令勝算大減，最後益咗建制派。有泛民仲直指傘兵都有真假之分，真嘅就係想推動民主，假嘅就利用人或畀人利用，同激進泛民當年嘅「票債票償」行動冇乜分別。
不過，由於呢班傘兵堅稱自己係真正民主派，又冇講到明要狙擊主流泛民，泛民好難同佢哋公開反面。成立十八區飯盒會，某程度可以產生「Q嘜」效應，方便啲泛民支持者分辨到兩班人，唔會咁易投錯票。
