政壇：田少傳孭鑊照窒自己友
立法會上月十八日表決政改方案甩轆收場，事隔約一個月，據聞北京對事件有新解讀，矛頭指向拒跟大隊離場嘅富貴黨先係甩轆「元兇」，曾喺社交網站譏諷其他建制派係「豬」同「人蠢無藥醫」嘅富貴黨立法會議員田北俊，再喺社交網站發貼轉載有關報道，一方面避談個人係咪喺政改「甩轆」孭鑊，反而繼續暗寸建制派自己友，直指其實啲豬都蠢唔晒，仲識賴落佢度，不過反應慢咗啲囉，用咗一個幾月先諗到。
相比之下，金融服務界議員「肥老闆」張華峰沉澱思考後別有一番感受，佢喺社交網站留言，形容建制派畀人嘲笑為「豬一般嘅隊友」，自言內心實在難受，強調大家要急起直追，唔能夠再被罵「豬」，又疑似意有所指希望大家能夠解開心結，放低個人恩怨情仇，坦誠溝通，更團結地站在一起喎。
仲記得政改「甩轆」後，起初將矛頭指向「等埋發叔」帶隊離場嘅行政會議成員林健鋒、建制派「班長」葉國謙等人，建制派唔同陣營其後互相卸責，互指不是，肥老闆今次講到出口叫各方解開心結，唔知最近譏諷其他建制派係「豬」嘅建制派中人，會唔會有所收斂呢？
