政壇：陸東話投資要有興趣識抽離
星級分析員陸東近日忙屋企嘢，話暫時呢一、兩年內都唔搞基金。唔搞，唔代表唔講，佢近排就講點先做到個成功嘅基金經理，就係投資要夠抽離，仲話投資乜都要有興趣先。
陸東話投資要訣有二：一是興趣，二是抽離。（資料圖片）
陸東出咗名係道光瓷器收藏家，但佢話古玩只係興趣，未算係投資。啲興趣會唔會最終回報好高變成投資？佢話唔知，但凡係對某樣嘢好大興趣，喺嗰度搵到大錢嘅機會就自然大增。事關有興趣，就會睇好多書見好多專家，咁先會精。
話時話，陸東十歲就開始「玩」古玩。佢仲成日「貢」去荷李活道尋寶。即係大家仲蒲緊機舖時，佢已經同古董舖經紀講緊價。咁點先做到一個成功嘅基金經理？陸東話佢入行三十年，見過無數失敗，至於成功例子都係投資時識抽離，只專注價值，而唔係睇股價，更加唔會日日對住部機撳股價。
