喺政改方案遭否決後，政府話要集中精力搞經濟民生，早前宣布會推行「全城清潔大行動2015」，據聞將喺下月一日舉行啟動禮，各區區議員亦陸續收到政府來信邀請佢哋配合參與。南區區議員司馬文尋日就上載咗張清潔運動襟章嘅相（圖）上社交網站，令運動口號首次曝光。

其中中文口號係「全城清潔，人人Ｘlike」。大家唔好心邪，個Ｘ字唔係粗口，而係豎起隻手指公讚like嘅網上符號，以政府宣傳口號嚟講算係幾破格，擺明係針對青年人宣傳。至於英文口號就係「Get Up.Clean Up.Thumbs Up」，有成三個Up字咁多，名副其實係Up得就Up。

不過，講到執垃圾、搞清潔，有幾多後生仔會有興趣吖？至於上咗年紀、為人父母嘅，依家最關心都係食物安全，即係鉛水危機。政府連啲水都未搞得潔淨安全，就算搞到條街乾乾淨淨，市民都唔得安心。

第一手消息請下載on.cc東網iPhone/iPad/Android/Windows Phone Apps