政府為咗成立創新及科技局，過去三年三度向立法會闖關都觸礁而回，主因激進泛民主派嘅議員始終唔肯停止拉布為創科局「開綠燈」，政府預料今年十月立法會復會後再為創科局闖關，最近建制派又開始新一輪軟硬推銷創科局行動，先有保險界議員陳健波話年輕人要買樓，創科局係唯一希望，尋日又到立法會議員EQ葛珮帆借消費信心民調硬銷創科局，竟然慨嘆無咗呢個局會影響市民消費信心喎。

設計圖片及對白

EQ早前曾幫盛傳會做局長嘅特首創新及科技顧問楊偉雄，約見議員，游說佢哋支持成立創科局。EQ所屬嘅政黨尋日公布涉及消費信心指數嘅調查，結果顯示喺近六百八十名受訪市民中，受訪者對代表經濟前景信心嘅「消費者預期指數」，由舊年底嘅七十點三上升至七十六；而綜合對過往、現在同未來看法嘅「綜合消費者情緒指數」同反映現狀嘅「目前狀況指數」同時錄得升幅，分別升至七十五點四同七十四點五。

科技興經濟 係大勢所趨

不過，指數上升又唔代表一切，據EQ分析，指數未超越分隔悲觀同樂觀水平嘅一百點水平，係因為創科局遭泛民無理阻撓至今仍未落實所致，另一方面，佢又坦承調查係冇問到受訪者對成立創科局嘅態度，只係估計科技帶動經濟係大勢所趨，順理成章會影響市民消費信心。

其實EQ所屬嘅政黨早喺○四年已開始做同類調查，翻查過去嘅數據顯示於○八年九月時，涉及消費信心嘅三個指數平均值只得五十六點三，點解佢哋喺七年前，又唔用冇成立創科局，做影響市民消費信心嘅理據，分分鐘當時嘅「說服力」會強過今日呢？

第一手消息請下載on.cc東網iPhone/iPad/Android/Windows Phone Apps