住廈車房清隱患 疏於執法埋炸彈

嗱，多個部門近日向車房業界發出聯合通告，表明會向構成迫切危險或嚴重滋擾嘅住廈車房採取執法行動，尤其係進行油漆工作嘅車房，由於會帶來較嚴重嘅火警風險及造成健康影響，更加會嚴格執法咁話。其中屋宇署仲講到明，隨時可以要求有關車房喺一個月內中止現有用途，否則會被檢控。換句話講，住廈車房面臨被迫遷嘅困局，估計一千八百間車房受影響，至少五千名從業員隨時飯碗不保。

即係咁，現行法例訂明，車房唔可以設喺民居下面，皆因當局一直有法不依，執法不嚴，先至搞到七國咁亂，危機四伏。係人都知，香港人煙稠密，車房同民居混雜，即係將計時炸彈放喺市民身邊，諗起都牙煙喇。事關公共安全，當局早就應該撥亂反正喇，依家至執法遲唔遲啲吖！

當然，凡事有利亦有弊，港府清除住廈車房亂象，對市民固然係好事，不過車房員工就徬徨咯。正如業界話齋，舊區民居嘅舖位租金相對便宜，如果被迫搬往其他地區，舖租隨時貴一至兩倍，好多車房恐怕無法支撐，難逃結業厄運。所以話，失職官僚真係害人不淺，本來已經搞到居民提心吊膽，家陣又搞到業界可能打爛飯碗，認真好帶挈。老實講，如果唔係當局拖延執法，問題就唔會好似雪球咁愈滾愈大，難怪業界一肚火，揚言發起抗爭行動喇。

講開港府監管不力嘅混帳，真係一匹布咁長。當局早於二○○○年已經聲稱規管車房安全問題，但拖到前年至推出車輛維修技工自願註冊計劃，仲要係自願性質嗰隻，難怪只有一成五車房參與。業界更加踢爆，當年引入石油氣的士，港府規定修理技工須完成指定課程成為「第六類勝任人士」，可惜當局有法不依，業界上告特首辦等部門，得到嘅回應係當年指引遣詞用字令人誤解喎，簡直不知所謂。

一句到尾，住廈車房隱患多，官僚失職埋災禍。前特首曾蔭權爵士禍港七年，留低唔少手尾，搞到家陣市民飲水驚中鉛毒，住屋怕車房爆炸，入公立醫院擔心中霉菌，咁搞法，香港想唔變成「危險之都」都難喇，叮！