主流泛民黨派今日辦退修營，商討政改否決後嘅最新局勢、與中央及特區政府嘅關係，同埋年底區議會選舉同明年立法會選舉嘅協調部署。據知主流泛民除咗面對傳統對手建制派同近年崛起嘅激進本土派，即將又要迎戰因政改爭議而分裂出嚟嘅溫和泛民，面臨三面夾擊。同時，已畀白鴿黨踢走嘅前立法會議員黃成智、同早跟白鴿黨貌合神離嘅前立法局議員Dick狄志遠，傳已決定正式組黨搶攻未來兩場選舉，大混戰一觸即發！

設計圖片及對白

我哋接獲可靠消息，成智同Dick已決意籌組新政黨，並有多名支持「和理非非」（和平、理性、非暴力、非粗口）嘅「金主」泵水支持，最快喺十一月區議會選舉前成立，打正旗號派約十名溫和泛民同中間派人士參選。就算趕唔切喺區選前成立，該批候選人都會以聯盟方式出選，希望喺過往只有建制派同主流泛民對決嘅區選中，殺出一條新血路。據悉，黃、狄二人將喺下月初赴台灣取經，商討吓籌組新政黨嘅細節。

據聞新政黨又會全力參與明年立法會選舉，最少都會揀當選門檻最低嘅新界東同新界西各出一人，目標係以不多於一成得票喺兩區各取一席。人選方面，成智梗係新東嘅不二之選，新西方面就有傳係做過葵青區議會主席嘅前白鴿周奕希；又指新政黨唔會「明刀明槍」向主流泛民「撬人」。

對於因湯家驊辭職而引發、預計明年初舉行嘅立法會新界東補選，據聞成智同Dick對參戰與否有唔同意見。成智認為呢個係新政黨宣傳嘅好機會，勝算唔大都應一試。但Dick認為補選係單議席單票制，參選極可能同主流泛民「攬住一齊死」，畀建制派漁人得利，累新政黨孭上「隱形建制派」、「建制B隊」等污名。

第一手消息請下載on.cc東網iPhone/iPad/Android/Windows Phone Apps