政壇：吳得掂猛晒功績除燶味
政府上周宣布免去原民政事務局局長曾德成同公務員事務局局長鄧國威職務，事件震驚政壇之餘，相信官場中亦人人自危。之前有消息話，除咗曾、鄧二人，仲有一至兩名問責官員曾經上過炒魷名單，當中包括出名表現平庸、有「遊埠局長」之稱嘅教育局局長吳克儉（吳得掂）。
設計圖片及對白
硬推國教不成 責無旁貸
吳得掂尋日出席活動時，被問到擔唔擔心難逃「被退休」嘅命運，佢就話問題屬於假設性，所以唔作揣測，但另一邊廂就猛咁晒功績，似乎係想同炒魷傳聞劃清界線喎。
吳得掂三年前推國民教育科唔成，仲搞到滿城風雨，喺件事上責無旁貸，有人質疑因為佢遵從中央指示，先可以留任教育局局長一職。吳得掂尋日話，呢個講法冇事實根據，所以唔作評論。
至於點評價自己任內推展青年工作嘅表現，佢話政府喺青年工作同政策方面做咗好多，包括職業教育同學徒計劃等，成個青年政策得以加強同優化。
徐英偉：曾德成樂意退休
另外，早前辭職唔成嘅民政事務局局長政治助理Caspar徐英偉，尋日出席活動時當然被追問前上司離職一事。佢話之前有同曾德成傾過，對方表示樂意依家退休，佢亦尊重對方決定。至於係咪同青年工作有缺失有關，Caspar話港府有人事變動係好普通，唔會回應猜測，現時最重要係令新局長無縫交接。
講開新上司劉江華，Caspar話已經認識對方一段時間，問到對方係咪唔受青年歡迎，佢話喺香港目前嘅環境下好正常，但認為對方有能力做好局長，真係識賣口乖。對於民政事務局副局長許曉暉係咪因無法上位而意興闌珊，Caspar話唔覺得有呢個迹象，又指對方依家好用心工作。無論前任定現任上司，Caspar都有讚無彈，唔怪得佢有離心都可以喺局內頂得住喇。
