千噸課本變垃圾 破壞環保責難卸

即係咁，教科書年年加價，家長任人魚肉，早就唔係新聞。而書商加價最常用嘅藉口就係改版，有書商求其改幾幅圖就話係新版，家長惟有焗住破財買「新書」。本來呢，當局規定教科書每五年至可以改版一次，可惜你有張良計，佢有過牆梯，出版商巧立名目，將同一科目「分冊上市」，最誇張係一科分成四十冊，唔到你唔服，至於用紙講究、包裝精美等等，就更加不在話下。羊毛出在羊身上，最後咪又係家長埋單。

教科書愈出愈豪，愈出愈多，家長浪費金錢仲係其次，破壞環境先至大鑊。唔少書商會喺新學年來臨前丟棄舊版教科書同教材，學生亦會趁暑假清空書櫃，以致大批新簇簇嘅課本就咁變成垃圾，直送堆填區。仲有吖，教科書頻頻改版，連帶二手書商都得物無所用，好多原本仲用得嘅舊書都要被迫棄置，簡直係暴殄天物。有回收商反映，短短一星期就收咗一百噸教科書，都咪話唔誇張。

點解出版商唔將舊版教科書送去循環再用？據講係因為部分教材未曾喺市場出售，擔心資料外洩，寧願包車將書籍直接運往堆填區喎。講真，呢啲只不過係藉口啫，正如業界人士話齋，出版社其實可以先將書籍切碎，進行機密處理後再回收，有人連舉手之勞都懶得做，唔單止係大嘥鬼，直頭係自私鬼喇！

正所謂，黃台之瓜，何堪再摘。係人都知，三個堆填區將會陸續爆滿，三堆一爐雖然勉強過關，但係遠水難救近火，加上當局宣傳源頭減廢講多過做，導致問題不斷惡化，垃圾圍城危機迫在眉睫，繼續由得書香變垃圾，香港遲早變臭港嘅咋。

話時話，要減少教科書浪費紙張，其實唔難，引入電子書就係一個可行辦法，弊在港產官僚眼高手低，搞到不倫不類，唔湯唔水，部分電子教科書甚至貴過傳統教科書，搞到傳統教科書印數不跌反升，都唔知好嬲定好笑。

始終都係嗰句，保護環境，人人有責。全世界都為減廢努力，香港點可以例外呢？港府又點可以袖手旁觀呢？