城中鏡：楊元慶泵水助公司轉型
做人父母甚艱難，聯想主席楊元慶就豪擲四千五百七十萬元投資落兩個「BB」度，寄望佢哋長大成人後可以幫番公司。呢兩個BB，唔曉喊唔曉叫Daddy亦冇呼吸，大B叫「神奇工場」，細B叫「茄子技術」，兩個B都係聯想生出嚟嘅。楊元慶啱啱就用咗大概二千八百萬元入股「神奇工場」4.42%，又用咗大概一千七百七十萬元入股「茄子技術」15.98%。
楊元慶自掏腰包投資「神奇工場」同「茄子技術」。（資料圖片）
聯想話要轉型都講咗好耐，今次楊元慶自掏腰包泵水，睇嚟真係想谷兩個B快高長大。呢兩個B係做乜？大B「神奇工場」做網店，好似小米咁自己賣埋智能手機、智能家居同軟件，市值大約六點三五億元。至於細B「茄子技術」係做雲計算，主要針對手機傳輸，依家市值都有一點一億元o架！
