城中鏡：仁愛聚喜靈
各慈善團體定期會到懲教署轄下唔同院所探訪，而今年仁愛堂就拉隊去咗一個較少開放參觀嘅冷門地方，就係喜靈洲懲教所及戒毒所。仁愛堂主席Kimmy史顏景蓮話釋囚接受教育可提高佢哋重投社會嘅機會，故決定以行動兼捐款十萬元支持在囚人士同懲教署人員子女嘅教育工作。
史顏景蓮（右二）同老公史立德（左一）及一對子女試餵飼在囚人士養嘅山羊。
邱子昭（右一 , 穿著長袖裇衫）講解在囚人士製作食物的過程。
仁愛堂總理李慧芬（左）同何歐陽翠華試食在囚人士製作嘅食物。
捐款助釋囚融入社會
仁愛堂一班成員日前坐船去喜靈洲，見島上設施比其他院所豐富，又飼有奇珍異獸，懲教署署長邱子昭解釋，因為喜靈洲係屬於低度設防嘅院所，多年前係痲瘋病院，加上現時主要用作康復治療，因此感化原素會比其他院所多。而島上因為環境特別適合唔同動物棲息，故海關緝私檢獲嘅部分稀有動物會被送到島上，如估計市值二十萬元嘅軸射龜、小葵花鳳頭鸚鵡同藍黃金剛鸚鵡等，均由島上經訓練嘅在囚人士照顧。
見Kimmy、佢老公兼仁愛堂前主席史立德及子女對懲教工作亦十分感興趣，於探訪期間亦問到喜靈洲嘅歷史同懲教署提供甚麼類型嘅培訓等，當知道在囚人士將有機會學習寵物美容，史立德仲決定另捐二十萬元支持「在囚人士教育信託基金」同「懲教署人員子女教育信託基金」，希望盡一分力助釋囚日後融入日常工作環境。
另外，除懲教所內嘅寢室、製衣工場同飯堂，佢哋仲參觀咗喜靈洲水耕栽培區同試食在囚人士親製嘅蛋糕。由於進入懲教所期間所有電子儀器都須被臨時收起，蔡少森等一班總理參觀完後，即急不及待要去攞番部電話睇訊息，笑言島上冇咗電子產品嘅生活唔易適應喎。
