都市人好忙，有時忙到連同屋企人食飯嘅時間都冇。和富社區服務網絡尋日搞咗個「愛從家開始」活動，鼓勵大家多啲返屋企同家人食飯，增進感情，作為籌委會主席嘅Dick狄志遠仲即場示範用十五分鐘煮白汁蘑菇火腿意粉。

狄志遠即場示範用十五分鐘煮白汁蘑菇火腿意粉。

不過，阿Dick可能唔慣無火煮食，一時又嫌個爐唔夠火力，爆唔香啲洋葱，一時又話無凍水將意粉過冷河，但最終都喺預定時間內完成任務，和富社會企業會長李宗德仲大讚好好味添！

主辦單位尋日公布關於港人返屋企食飯嘅調查結果，發現五成六受訪者每月返屋企食飯少於十次，四成人係因為要同朋友聚會，而因為工作因素嘅只有一成八。阿Dick就話，就算幾忙都會盡量煮飯畀家人食，放假甚至會花大半日去整上海雲吞，而平日六點收工，花十五分鐘都可以煮好簡單嘅家庭餐。佢仲話透過煮飯畀家人食，會令佢覺得自己對屋企有貢獻喎。

第一手消息請下載on.cc東網iPhone/iPad/Android/Windows Phone Apps