政壇：搞搞政：德成被炒疑涉新老愛國之爭
中央政府同特首CY梁振英提早將原民政事務局局長曾德成同原公務員事務局局長鄧國威免職，震驚整個政壇，尤其係年輕時因派發反殖民傳單而坐過監嘅曾德成被「炒」，引發唔少「老愛國」不滿。
設計圖片及對白
傳曾為任命有爭拗
鄧國威被炒後，多個之前批評佢唔肯聽意見嘅公務員同紀律部隊團體，都先後公開或私下叫好，並對做過紀律部隊首長、擅於同工會打交道嘅新任公務員事務局局長張雲正有好高期望。相反，政界對曾德成被炒嘅反應就相當極端，唔少「老愛國」都替呢位老戰友不值，認為佢一生愛國，冇理由落得如此下場，紛紛透過唔同渠道、在明在暗咁對有關方面表達不滿，據聞部分人仲走去「西環」投訴添。但消息話呢批「老愛國」真係搵錯人投訴，因為曾德成被炒嘅「罪狀」，除咗喺多項諮詢委員會同授勳名單任命上抗拒CY嘅人，連部分由「西環」推薦嘅人都曾經被佢「彈票」。
眾所周知，近年「西環」提名咗好多本港同內地商界出身嘅「新愛國」人士畀特區政府，唔少本地「老愛國」都對有關做法有微言，質疑呢班「新愛國」除咗有錢之外，對特區嘅愛國事業並冇實質貢獻。
有傳曾德成早前曾就一位涉嫌在內地參與過違法活動的「新愛國」人士任命，同CY公然「吵大鑊」，甚至揚言要為此辭職。但其實大家都知道有關推薦係嚟自「西環」，根本同CY無關，最後曾德成變成「被辭職」。行政會議成員張志剛尋日出席電台節目時，聲稱愛國並無新老之分，今次事件與「新愛國」同「老愛國」之爭無關，真係講都未必有人信。
