政壇：貝索斯逆市秒賺二千萬元

過去一星期，科網股一刻天堂一刻地獄。周二蘋果業績一出，累科網股地震，中美科網股市值加加埋埋震走咗一點五萬億元，一班揸重貨嘅富豪都中招，連股神巴菲特都唔例外。不過，亦有人喺四十五分鐘內身家多咗五百六十億元，即係每秒二千零七十四萬。嗱，你睇埋呢句嘅一秒，佢又賺咗五架法拉利。

亞馬遜嘅業績好過預期好多，股價係咁升，帶挈貝索斯身家暴漲。（資料圖片）

呢位一秒等如好多人成世身家嘅，就係亞馬遜創辦人貝索斯。多得亞馬遜夠生性，業績好過預期好多。周四公布完業績股價就係咁升，帶挈貝索斯喺短短四十五分鐘帳面賺咗五百六十億。如果養大一個B要四百萬，咁佢所賺足夠一點四萬個B由BB班讀到上大學，年年報足十一個興趣班都仲得，但唔包上車。

不過股市嘅嘢，今日以為蝕咗，聽日發現賺番凸，但後日可能又唔見咗一截。Google早一個星期業績好省鏡令股價急升，市值一夜飆五千億，點知呢個星期跟番大隊齊齊跌，市值一晚忽然就咁無咗二千億。無論有幾多個零，都只係如夢如泡影，發完夢瞓醒，下周請早。