政壇：冒中聯辦行騙殺到立會

近日香港各界陸續收到冒認「中聯辦」電話，聲稱對方喺內地干犯罪案，要求畀錢，尋日就又有一名九十後少女，被騙徒以同一手法呃走七萬元，甚至連立法會亦受害。立法會秘書處總務部尋日朝早發電郵通知，話有唔少秘書處職員接獲自稱中聯辦人員嘅電話留言，以「取回文件」等方式呃職員按錄音指引，致電指定電話回覆。

總務部引述番中聯辦有關負責人日前公開澄清，講到明中聯辦同內地公安、檢察機關從未、亦冇可能直接向香港市民發送呢類電話留言，強調上述行為純屬騙局，提醒如果接獲類似電話，應該保持警覺，唔應該輕信，亦不應透露任何個人資料。

其實依家手機有唔少冒認電話號碼程式，標明可以偽造來電顯示號碼，當惡作劇呃朋友，但就好易畀不法之徒作行騙用途。有互聯網專家建議大家安裝一啲能夠過濾來電號碼功能嘅軟件，將可疑電話號碼加入過濾名單。